సోషల్ మీడియా బంధాలు

అంశం :సోషల్ మీడియా బంధాలు

నేటి బంధాలకు –

డిజిటల్ స్క్రీన్‌లే వేదికలు.

మాటల్లో మాధుర్యం తగ్గింది,

ఇమోజీల లాలిత్యమే మిగిలింది.

లైకు పెడితే ప్రేమేనా?

కామెంట్ రాలేకపోతే విరోధమా?

వాట్సాప్ స్టేటస్‌లలో దాగిన పిలుపులు,

కాల్ చేయకుండానే "బిజీ!" అనుకునే మనసులు.

ఒకప్పుడు బంధాల బీజంగా మొలిచిన స్నేహాలు –

ఇప్పుడు నెట్‌వర్క్‌ పరిచయాల్లో కలిసిపోయాయి.

బంధం ఒక ట్యాగ్‌ అయింది, ప్రేమ ఒక హ్యాష్‌.

ఫొటోలకు ఫిల్టర్లు, నవ్వులకు స్టిక్కర్లు,

కానీ మనసుకు మాత్రం మాస్క్‌ తొలగించలేము.

విష్‌లు ఫార్వర్డ్‌ చేస్తాం – దూర మిత్రునికి,

కానీ పక్కనుండే వారిని పలకరించకుండా వెళ్తాం.

గడియారం ముందుకు పరుగెడుతుంది,

బంధాలు మాత్రం వెనక్కి జారిపోతున్నాయి.

వాస్తవ ప్రేమకు వెబ్ అడ్రెస్ అడిగే కాలం ఇది,

కన్నీళ్లు కూడా ఇప్పుడు సింక్‌ అవ్వాలి!

ఓ మిత్రమా!

స్క్రీన్‌ను కాసేపు పక్కన పెట్టు, నన్ను చూడు –

నేను ఈ డిస్‌ప్లే కంటే లోతైనవాడిని.

బంధం నెమ్మదిగా నడవాలి – చేతులు పట్టుకుని,

ఫాలోలు కావు, పక్కనుండే నీడ కావాలి.

ఓర్పు, ఆసక్తి, ఆత్మీయత – ఇవే నిజమైన కనెక్టివిటీ,

సిగ్నల్స్ కంటే మనసులే శాశ్వతమైన నెట్‌వర్క్‌.

నువ్వు పక్కనుంటే –

నోటిఫికేషన్ అవసరం లేదు.

 నిశ్శబ్దపు తెరలు వెనుక బంధం కాదు

 మనసుతో నిండిన బంధమే కావాలి.

రచన మధునాపంతుల చిట్టి వెంకట సుబ్బారావు

కాకినాడ 9491792279