పోరాటం

తెల్లవారి లేస్తే జీవన పోరాటం ప్రారంభం.

కొందరికి ఇల పైన పోరాటం

మరికొందరికీ కడలే జీవనరణరంగం .

వల చేతపట్టుకుని వలపులు అణచుకొని

ఏటికి ఎదురు ఈదడమే నిత్యకృత్యం.

నిత్యం బ్రతుకు వేట కోసం ఆరాటం.

చేపల పులుసు నోటికి బానే ఉంటుంది.

వల వేసి పట్టే బెస్త వారి కష్టం ఎవరికి తెలుసు.

ప్రాణం పణంగా పెట్టే బ్రతుకు పోరాటం వారిది.

ఏ అల ఏ నిమిషంలో ముద్దాడుతుందో తెలియని

నడి సంద్రంలోని పోరాటం.

కడలి కరుణిస్తే వల నిండా జలపుష్పాలు.

జలధి అల్లకల్లోలం అయితే తనువు నిండా పుష్పగుచ్ఛాలు.

కడుపు శోకాలు అనంతాలు

అలకి వలకి మధ్య జరిగే జీవన పోరాటం

రచన మధునాపంతుల చిట్టి వెంకట సుబ్బారావు.

         కాకినాడ 9491792279